01.01.2003, wh/Wolfgang Hofer

Gleich
oder: Der Selbe

Ich sitz im Iglu in meim Garten,
und wuid so aufn Postbot warten.
Aus Plastik war das Iglu gmacht,
weil Schnee hat Petrus koan zsammbracht!
I schaug so aus der Hüttn raus,
da seg i mi, i hoids ned aus!
War denn der Glühwein doch zu stark,
es schüttelt mi in Bein und Mark.
Do steh doch pfeigrod i do draußd,
Und meine Haar warn ganz zerzaust.
Wie wenn i gschlüpfd war aus am Oa,
es is ois gleich vom Kopf zum Boa!
Wer hod des Wesen konstruiert,
des do mein Gartn inspiziert?
Er kimmd sche staad zu mia daher,
was gab i um a Schießgewehr!
Jetzt schauds bei meim Iglufensta rei
Und sogd zu mir: Des is des mei!
Geh raus aus meina schena Hüttn,
sonst ließ i da deine Leviten!
I bin vadutzt, i schaug rechd bläd,
es red wia I, des gfoid ma ned!
Doch weil a so bedrohlich schaud,
und ma fast Angst griagd daß er oan haud,
bin i aus meiner Plastikhaut,
so schnei wias ganga is obghaud.
Jetzt sitzd a drinn und sogd zu mir:
Jetzt bringst ma no a Hoibe Bier!
An Rade und a Lebawurscht,
i hob an Hunger und an Durscht!
I schaug eam wia an Spiagl o,
i wuids ned glam, doch er war do!
Und Speis und Trank hob i serviert,
und er hod fröhlich schnabuliert.
Doch dieser Klon hod ned bedacht
Daß zuviel Bier leicht müde macht.
Und während er no gschlafen hat,
hob ich ihn in mei Auto packt.
Und hobn dann im Packet ganz geschickt
Per Luftpost noch Neuseeland gschickt.
Und wia i hoamkimm noch na Stund,
da gäds im Garten richtig rund,
do is a ganze Klonarmee,
de packan mi, des duad so weh.
Sie gleichen sich um Jahr und Haar,
daß schon gefärbt und schütter war.
Sie sahen, jessas, ei der daus,
wie meine alte Trude aus!